"Құп алдым ықыласыңды замандасым,

Белгілі сенен жақсы таба алмасым.

Сонда да үмітіңді үз, менен түңіл,

Доп емес әркім қағар менің басым.

Көз тігіп қарадың деп күйе жақпа,

Жақсаң жақ, жөні келер жерін тап та.

Ақылмен алды-артыңды шолып алмай,

Қарны ашқан қасқырға ұқсап қойға шаппа!

Қарасам, сүйгендіктен қарамаймын,

Сүйсем де, сол сөзіңе жарамаймын.

Арыстан айға шауып мертігіпті,

Секірме, қолың жетпес көктегі аймын.

Сілтей бер маған жетер қолын болса,

Даңы жоқ, даңғыл жатқан жолың болса.

Ашық жол, асулы қол болар еді-ау,

Бірақ жоқ, әттең дүние, соның болса...

Сен шыда, күйіп тұрсың, бір-ақ отқа,

Болсаң да қандай қызу жалын шоқта.

Аузың айтып, ар жағың біліп тұр ғой,

Екі оттың арасында тұрғам жоқ па?!"