Paulo Koelho — tanınmış Braziliya yazıçısı və şairi.
Ümumilikdə, Koelhonun müəllifi olduğu 30 kitab nəşr olunub. "Zəvvarlıq", "Valkiriyalar" və "Elif" əsərləri avtobioqrafik xarakter daşıyır. Digərləri isə müəllifin təxəyyülünə əsaslansa da, kökləri reallığa gedib çıxır. "Maktub" və "İşıq savaşçısının kitabı" əsərləri isə məqalələr, qəzet köşələri və seçilmiş öyrədici materialları özlərində toplayır. Ümumilikdə, Koelhonun kitabları 150 ölkədə 100 milyondan çox nüsxədə satılıb və onun əsərləri 71 dilə tərcümə edilib. O, bütün dövrlərin portuqal dilində ən çox satılan əsərlərin müəllifidir.
İndiyə qədər "Kimyagər", "On bir dəqiqə", "Rio-Pyedranın sahilində oturdum və ağladım", "Veronika ölməyə qərar verir", "Zahir", "Maktub", "İşıq savaşçısının kitabı", "Aldatmaq" əsərləri Azərbaycan dilinə tərcümə edilib. Mütəmadi olaraq aparılan statistik araşdırmalara əsasən, Azərbaycan dilində nəşr olunan kitablar uzun müddət satış həcminə görə onluqlarda ilk pillələrə çıxıb.
Paulo Koelho həmçinin həftədə üç dəfə öz bloqunda qeydlər edir.
